Programming Methodology

Programming Methodology tih hi a awmzia ber chu computer program kan ziah dawn emaw, application kan siam dawn emaw a kan hriattur pawimawh leh tangkai tihna a ni mai awm e. Thiam dan leh ngaihtuah dan hrang hrang nei mihring kan nih avangin inrualkhai zawk
, tha zawk leh awmze nei zawka product kan siam nan leh midang tana lo hmuh leh hriat thiam awlsam nan he technique hi coder/developer tha ni tur chuan hriatthiam mai ni lovin hmanthiam a pawimawh hle a ni.

Give a man a fish, you feed him a day; Teach him how to fish, you feed him the rest of his life

Enge hriat ngai?

A hmasa berin, programming code ziak tur kan nih avangin, i hman tur programming language(a bikin basic programming syntax) kha a zau thei ang ber hriat a ngai a, hriatkim vek leh hmankim vek tum hmasak erawh a finthlak ber lem lo.

Program hian a tih ber chu data(collection of information) kan mamawh anga pawh darh leh remkhawm ani mai a, mahse hemi ti thei tur chuan kan hman tangkai ber tur data hi hriatchian hmasak a pawimawh. Data hi chi hnih Numerical(numbers) leh Alpha-numeric(numbers lo zawng) a awm a. Tin heng hlawm lian pahnih te hi chi hrang tam takah an la then darh leh theih a (hei chu kan topic pawn lam deuh anih avangin kan sawi rih lovang), mahse hriattur pawimawh ber erawh chu, heng data i remkhawm/pawhdarh leh hman dan a zir hian i program kha a that leh rintlak lam thuah kawngro a su thui hle a ni.

Engte nge pawimawh?

1. Data Structure
2. Algorithm
3. Modular Programming
4. Structured Programming
5. Analysis of Algorithm

Data Structure

Nupui pasal a insiam tura pawimawh ber chu Hmangaihna a ni a, chutiang bawkin Programming khawvelah hian eng language pawh hmang la (User Interface lam khawihna language nilo), Data Structure hi a pawimawh ber ti ila ka tisual tam awm love. Kan program a data leh logic thlungkhawmtu anih avangin data structure hi a pawimawh fal hle a, i program ziah that leh that loh (efficiency) leh rinawmna (reliability) ah a in nghat thui hle a ni.

Engineering ka zirlaia Subject khat tawp a awm a ni a, tin, text book chhah fahran kan nei bawk a, chuvang chuan he post-ah hi chuan Data Structure chungchang ka sawivek theilo mai nilovin ka thiam vek bik lo. Mahse a pawimawh laite tlem ka rawn thailang ang.
Data structure a DATA kan tih tak hi a chunga ka rawn sawi tak data nen khian a in ang lo deuh a, Data Structure huangchhung bikah chuan miin data an tih chuan database a TABLE kan tih ang hi a kawk zawk a ni. Tin DATA chhunga information awm ho kha ELEMENTS of DATA an ti leh.

Anih leh a englai tak hian nge Programming Methodology a Data Structure ti pawimawh em em tu tia i zawh chuan, heng information i pawh darh leh remkhawm dante, engtinnge computer memory-ah i store tihte, hemi piah lamah heng data-te hi i hman dawnin engtinnge i lakchhuah(retrieve) dan tihte leh a result engtinnge memory-ah i store leh tihte hi data structure huangchhunga awm an nih avangin Data Structure hi a pawimawh a ni.

Data Structure = Organized data + Operations

Algorithm

Tuk tuan eikhama enge i nileng hna tur tih i rilru a i suangtuah kha lehkha phekah ziak thla la (point by point in, essay type chu tuman an chhiar peihlo), kha i ziah chhuah kha vawiin atan i algorithm a ni. Hetiang bawkin programming khawvelah pawh hian i program khan engtin nge hna a thawh ang tih i suangtuah a, a tha thei dan ber(a tha ber ni kherlo, a tha ber tum nghal kher hi mi tam tak hlawhtlin lohna a ni chawk) tur nia i hriat kha i program ALGORITHM chu ani.

Algorithm i ziah dawn in a hmasaberah i problem kha ziak chhuak hmasa la, chuta tang chuan a solution tur i ngaihtuah hnuah i ziak chhuak leh dawn nia. He process hi chu informal process ani a, algorithm ziah dan tur dik erawh google/text-book lam atangin ilo en ve mai dawn nia.

Algorithm ziah dan chi hnih te chu Top-Down leh Bottom-Up te an ni.

Modular Programming

I program a data inlaichinna leh algorithm pawimawhna kan sawi tawh a, tunah chuan a program code ziah dan(implementation) kan kai tawh ang. Modular han tih chuan kan rilru ah "thil then hran" tihin lo ngaihtuah ta ila. Program lian tham leh update/improve zel tur chi program kan ziak dawn anih chuan Modular programming technique hi hman tur a ni. Tin, program lian vakloah pawh hman thiam chuan code a ti fel faiin debug (a diklo lai zawn chhuah) a ti awlsam bik. Company/corporate level-ah phei chuan mi hrang hrangin project a part hrang hrang an develop avangin he technique hi an hmang nasa hle a ni.

Modular programming ah chuan "Function" kan hmang tam a. Tin, "Function" tin hian mahni hna chanvo bik mumal takin an thawk tur a ni a, hemi bakah hian function dang nen an data inhmantawm chungchangah inlaichinna a tlem thei ang ber an nei tur a ni. Function pakhat buai vangin Function dang an buai ve vak tur a ni lo. Sawi mai hi chuan program ziah dan tur alawm heng te chu kan ti maithei, mahse project lian tham han thawh a, code han ziah tak tak chuan professional ho pawh hian modular programming hi handle buaithlak an ti thei khawp mai, junior developer tan a harsa leh zual. Algorithm leh Project requirements-te hriatchian a ngaiin, co-operation tha a ngai em em a, hemi piah lamah hian supervisor tha an pawimawh hle bawk.

Hetiang a buaithlak leh ngaihtuah ngai, development laia hun heh bawk si hi engatinge programming-ah a pawimawh kan tih chuan siam tirh atangin hlawm te tak te te ah kan program kha kan then nghal a, nakinah a khawilai emaw thlak/siamthat lo ngai se, a awlsam in hun a heh tawh lova, tin diklo leh thalo lai a awm pawhin siamthat a awlsam zawk tawh thin. Modular programming chu kan hriat theih dan tur awlsam berah chuan "Divide and Conquer" ti ila a tha awm e.

Structured Programming

Programming ziah dan (implementation) chi dang pakhat structured programming-ah ve thung hi chuan kan program kha then sawm chin deuh nei mah ila, function a data leh data structure te an in ring tawn (relation) in pakhat awm loh chuan pakhat dang a thawk lo thin.

Tin, a programming syntax ah pawh he technique hi chu program tluangtlam pangngai a ni mai a, tehkhinnan ni (day) i hman dan tur kha a in dawtin ziakthla la, a tawp lamah chuan tlailama i hun hman dan tur i ziak ang bawk in, structured programming ah hian kan program khan a hnathawh tur tulte a code hmasa lamah kan ziak a, tichuan a hnathawh tur hnuhnung deuhte kan ziak ve chauh thin. Sawi tawh angin Modular-ah chuan hetiang a ni ve lo, kan duh lai lai kan ziak hmasa a, kan remkhawm leh mai chauh zawk a ni.

Structure leh Modular-ah hian tha zawk leh rintlak zawk a awm chuanglo a, kan project mamawh dan a zir leh, kan thawh dan tur a zira kan thlan thiam kha a tha a ni mai. Mahse professional-te tawngkam atang chuan structured hian hman a hlawh vaklo zawk a ang.

Analysis of Algorithms

Algorithm kan design/ziah zawh hnu khan kan algorithm kha a that leh that loh tehna a awm a, chungte chu Space Complexity leh Time Complexity tih an vuah. Tin, kan algorithm a kan logic hman kha a dik tawk leh tawk loh uluk takin step-by-step in chhui tur a ni a, tin kan chhui chhuah hnuah Mathematical data hmangin a dik tawk leh tawk loh chhui chhuah leh tur a ni.

Space Complexity han tih chhuan kan program size ai mahin kan program in tluang taka in execute zo tura memory a mamawh zat tihna a kawk mah mah a. Tin, Time Complexity hi chu kan program khan tluang taka in execute zo turin hun eng zat chiah nge a mamawh tihna a ni. Time complexity zawk hi chu machine dang dangah (hardware performance vangin) a result a inanglo thei viau a ni.

Note: Heng sub topic 5 kan rawn sawi thliah thliah te khi a keu hawnna lek chauh vek an ni a, topic lian leh pawimawh tak tak vek an ni tih hriat a tha hle.

Source:http://www.herawt.com